ტკივილებს თუ მიიჩვევ

ტკივილებს თუ მიიჩვევ,
ისინი მოვლენ სიხარულის დროს
და, როგორც ბავშვები სახლში,
ყვირილით, ხმაურით, დაუკითხავად
და უდროოდაც
შემოცვივდებიან
შენს უმაღლეს მყუდროებაში.

ვინღა გაყრის სახლიდან ბავშვებს?!.

ნუ მიიჩვევ ტკივილებს.

ირბინონ მათ სახლის გარშემო,
თუნდაც ფანჯრები ჩაგიმტვრიონ,
ან ღამეებში გიძახონ დიდხანს,
კარს ნუ გაუღებ,

მხოლოდ ერთხელ დაენახე, რომ
შენმა სახემ შეაშინოთ და
შეზაროთ და
ისევე ისე,
როგორც ბავშვები,
შორს, შორს წავიდნენ ტკივილები
და სხვის ფანჯრებთან
გააგრძელონ ზრდა და
სიცოცხლე.