არ დაუხარო სიტყვას თავი ..

არ დაუხარო სიტყვას თავი,
სიტყვა მოხარე,
გადაიწანი მკლავზე ქალის ანწლისფერ თმებად,
რომ დოლაბმობმულს
ზღვის ნაპირზე დაგხვდეს მოყვარე,
რომ წკვარამ ღამით
ცხრათავიან დევებს შეება,
რომ შუბლშეკრული
გადაუხსნა ღრუბელს საკინძე,
რომ ნამძინარევ მზეს დაჭორფლილ მკერდზე შეეხო...
და ახალსისხამს
კოკისპირულ ლექსად გაწვიმდე.

არ დაუხარო სიტყვას თავი,
სიტყვა მოხარე.