მთხოვნელი მსაჯულისადმი

ლექსი „მთხოვნელი მსაჯულისადმი“ სინამდვილეში ეკუთვნის იოსებ სიმონის-ძე მიქაბერიძეს (კოწია მიქაბერიძის მამა)б რომელიც გარდაიცვალა დაახლოებით 1888-9 (წლებში დაბადების წელი არ ვიცი). იოსებ მიქაბერიძეს მისი სამსახურებრივი ვალდებულებით (მუშაობდა ზუგდიდსა და სენაკში „Окружным начальником“) ხშირად უხდებოდა სხვადასხვა სამოქალაქო დავის გარჩევაში მონაწილეობა. ბებიები მიყვებოდნენ, იოსებ მიქაბერიძის გულკეთილებასა და სამართლიანობაზე სამეგრელოში ლექსებს წერდნენ და ჩონგურზე ამღერებდნენო. ეს ფაქტი ავღნიშნე იმიტომ რომ მეჩვენებინა, თუ რამდენად აღელვებდა მას სამართლიანობის თემა, რომელიც ამ ლექსის მოტივს წარმოადგენს. ლექსი „მთხოვნელი მსაჯულისადმი“ დაწერილია 1857 წელს და არ არის მისი ერთადერთი პოეტური ნაწარმოები. იოსებ მიქაბერიძე და რაფიელ ერისთავი მეგობრობდნენ იმდენად, რომ იოსებს რაფიელისთვის გაუგზავნია ეს ლექსი თავისი სახელის და გვარის ხელმოწერით და თხოვნით, დაებეჭდა იგი ჟურნალ „ცისკარში“. მართლაც ლექსი დაიბეჭდა „ცისკარში“ 1861 წელს. 1958 წელს ლექსი შემთხვევით, ვიღაცის დაუდევრობით მოხვდა 1958წ. გამოცემულ რ. ერისთავის ერთტომეულში (გამომცემლობა „საბჭოთა მწერალი“, გვ. 555), რის მერეც სამუდამოდ მიეწერა რაფიელ ერისთავს.
მნიშვნელოვანია ისიც, რომ რაფიელ ერისთავისთვის ამ შინაარსის ლექსი საშიშროებას არ წარმოადგენდა, იოსებ მიქაბერიძის მხრიდან კი, მისი თანამდებობის გათვალისწინებით, იმ დროს ამ ლექსის საკუთარი სახელით გამოქვეყნება საკმაოდ გაბედული ნაბიჯი იყო.

იოსებ მიქაბერიძის შთამომავალი, ნანა იოსელიანი