რამდენი მკვდარი გროვდება დასამარხი ..

რამდენი მკვდარი გროვდება დასამარხი.
არა და, უყურებ - თვალებია:
შავი. ოდნავ მორუხო.ხავსისფერი...
ისეთი ფერებია,
თითქოს დამრეცილ ფერდობს შემოდგომა შემოეპარა.
იმდენი მკვდარი ფოთოლი გიყურებს მიწიდან,
იმდენი ნაცნობი თვალი გდია მიწაზე,
გეშინია,
ნაბიჯს თუ გადადგამ - ნაღმებივით გაგისკდებიან.
რამდენი დასამარხი გროვდება,
უნდა გადაითხარო მთელი გული, რომ ჩაიტიო.
არ ჯობია, სულაც, ცეცხლი მიუკიდო
და გამოტრიალდე?