ბურანში მყოფი თოჯინები და კიდევ რაღაც ..

1
ახდენილ სიზმრის უარმყოფელი რიჟრაჟის მოთქმა,
თითქოს თეატრში
პატივდებულის გვამი იხრწნება. საკვამურზე - მუნჯი ყვინჩილა,
ჯიბეში ბომბი - სისხლიანი კენჭების გროვა და კიდევ -
ხვიშტი, შეუხორცებელ უფსკრულებს შორის რომ ირხეოდა.

2
ჩინური ფუნჯი - პატარძლის ლოყა - ხანგრძლივი კოცნის
რიტუალებში რომ დაორსულდა.

3
ამოიღლიავა
ბურანში მყოფი თოჯინები და სულის წამღებად გაუჩინარდა.

4
შენ კლავ საკუთარ სხვას ეხეთქები, ჟღალ წვერს
იპარსავ, მღვრიე თვალებში გაელვებულის ლამობ შეპყრობას.

5
გიხდებოდაო, გეტყვის უცნობი, როცა მის მაღალ,
ქათქათა ყელზე
მფეთქავ ძარღვს ნაზად სულს შეუბერავ, ცრემლს აულოკავ.

6
ჰოდა, ეს ტექსტი ლორთქო ბალახად რომ იქცეს ახლა,
გაჭაკნებული
სახედარიც აღარ დაყნოსავს, ზურგს შეაქცევს და აყროყინდება.

7
თუმცა, შენ ლექსი ღმერთკაცის სულთქმა გეგონა,
მაგრამ…
მღვრიე ნაკადშიც ხომ შეიძლება ხვითოს დალანდვა,
და სახრჩობელას ყულფიდან ხილულ ცამ აგირეკლოს
სულ სხვა არსებად.

8
იმართლებ თავს და, სიწითლე იგი, სიმორცხვის მაგმა
ჩუმჩუმად კანქვეშ გაიწოვება.

9
ხოლო დიდება - წყეულთა ჰიმნი - გეშს რომ აიღებს,
სხივის სიჩქარით გამოქანდება,
შენ ჩემო ძმაო, ფეხს ვერ აიდგამ,
ვერ გამოაღწევ
ნისლოვანიდან.