ჩემი ბავშვობა

ჩემი ბავშვობა აუღებელ ყანაში დამრჩა,
ტალახისაგან ამოყვანილ პატარა ქვაბში
და პაპაჩემის გათოხნილი ვენახის ბოლოს,
ლობიოსა და სიმინდების არეულ კვალში...
ჩემი ბავშვობა ჩამობერტყილ კაკალზე თრთის და...
ბაბოს ღობეზეც დღეს სხვა აცხობს ტალახის შოთებს,
მეზობლის სახლშიც წლეულს უკვე სხვა შეაბიჯებს
და საახალწლოდ ჩემს ტკბილეულს სხვა მეკვლე მოკრეფს...
ჩემი ბავშვობა სოფლის თავში, წყაროზე ტირის
საუკუნოვან დოქის ყელში, მე რომ ვერ დავძარ...
მხრებაწურული ვთრთივარ, როგორც ფოთოლი ქარში
და ვეთხოვები ლაღ ბავშვობას პაპას ვენახთან...
(თეა)