,,დავტოვო, მე უნდა, მულახი..."

ჭიხვინებს ნაჭედი ულაყი-
სვანეთის ჭაღარა მთებიდან...
დავტოვო, მე უნდა, მულახი
და დაე, მომკვეთონ თემიდან!

მეძახის ბებერი ლალვერი,
ვუმღერო- ,,ლილე" და ,,იავო"...
სანაცვლოდ არაფერს არ ველი,-
მარტო შენ ამყევი, ნიავო!

დავლაშქრო ფარი და გულიდა,
რუსავით გავტოპო ენგური!
გავძარცვო მკერდსავსე გულიდან-
თაფლივით ყვითელი მენქური...

გავთელო გზები, დახეთქილი!
თუ მღერის წისქვილის ერული-
ვიცეკვო ,,ფერხული",- ბეთქილის!
იქნება, ვიცეკვო ,,ცერული"...

მაღალ მთებს შევყვირო კოშკიდან,
ხმა- ექოს, ჩანგივით ავუწყო...
და მერე, მოვკვდები, ო, მშვიდად!
ო, მშვიდად, სიკვდილი აუწყონ,

აოკონ- ნაჭედი ულაყი-
სვანეთის ჭაღარა მთებიდან...
დავტოვო, მე უნდა, მულახი
და დაე, მომკვეთონ თემიდან!

თამთა მუმლაძე ✏