სიმარტოვე

ეს თანადგომა, ეს მხარდაჭერა - აზრი
სიცოცხლის არის მარადის,
გამქარვებელი დაუეჭვებლად -
ლოდივით მძიმე, ვერაგი დარდის.
მაგრამ ხანდისხან, მაგრამ დროდადრო
გვსურს მხოლოდ ერთი - მარტოდ დარჩენა,
მხოლოდ სიმშვიდე და სიმყუდროვე -
დაღლილი სულის გადასარჩენად.
განმარტოებას უთუოდ ახლავს
სხვა სურნელება - სპეტაკ იელის,
და აფეთქებულ აპრილის მსგავსად
ეშხი აქვს სანდო, გასაკვირველი.
დიახაც, ეგებ ამ სიმარტოვით
ჩვენ ვეგუებით წამს დაუნდობელს,
როს მოგვიხტება თვალთ გამთოშავი
და წარგვიძღვება უმალ - დიდ სოფელს.