შეცდომებისკენ მიმავალი გზები

დაე, გახსოვდეს
ყოველთვის,
როცა
მეგობარს კოცნი,
ან შეყვარებულს ემშვიდობები,
ან შვილს აცილებ
სკოლაში,
ბაღში,
თუ სამსახურში -
მას ემუქრება მთვრალი გამვლელი
ან - ცოფიანი ძაღლი ქუჩაში,

ემუქრებიან ცუდი მძღოლები -
ფერგადასული საღებავი გადასასვლელზე
ან მწვანე შუქის დაგვიანება,
და სულ ახალი ავტობუსიც
ან ძველი მეტროს
გაუმართავი ინფრასტრუქტურა,

მას ემუქრება დიზენტერია
ან - დაუდევრად გაყვანილი
წვრილი სადენი
ესკალატორის მოაჯირის ქვეშ

ემუქრებიან უჯრედები
უმიზეზოდ რომ განაგრძობენ
გაყოფასა და გამრავლებას,
რის შედეგადაც
სხეულს სიმსივნე უვითარდება

და რომ ისევ ვართ,
გეფიცები,
ეს სიყვარულის ახსნაცაა,
მაგრამ, გახსოვდეს -
როცა შორდები
მას ემუქრება
შემთხვევითი კრიმინალი
ანდაც, ვარსკვლავთა
განაწყენება

დაე, გახსოვდეს,
რომ ყოველ ჯერზე
უნდა შეგეძლოს
მათ უმნიშვნელო არსებობას
უთხრა,
მშვიდობით,