ხელშესახები

#ლექსები

ნინო დარბაისელი

ხელშესახები

არც ტაძარია - ღმერთი, არცა ადგილი რამე,
თუნდაც მლოცველმა გულით - ყოფა მთლად გაიხრამე!

უხილავია ღმერთი, ის არ უხილავს მოსეს -
- ღვთის ანგელოზის ნათლით ნამოსი - ნიღბით მოსეს.

მამა - იხილა მხოლოდ იესომ. მასთან სუფევს.
ერს რომ მეოხად ჰყავის, სულში მალამოს უფევს.

კათალიკოსი მოკვდა და შენკენ მოიხარის!
ღვთის მირონცხებულს(!) დასდის ცრემლები მგლოვიარის,

ერისთვის - რა არ სცადა, ერს ბევრიც არგო მართლა,
მაგრამ არ ნიშნავს, ვიწყოთ მისით ჟამთასვლის ათვლა.

მასაც შეუნდე, ბევრი მასაც შეშლია - მოკვდავს,
მთავარი ამასოფლის სდევდა, რეკდა და როკდა.

ჩვენც გვაპატიე, - ჭირში გადამეტება ვიცით,
ციურს ვერ გწვდებით რაკი, მიწიერს ვეკვრით ფიცით.

გლოვაა ერში დიდი, ტირილი ზედ დაგვერთო,
სჭირდება მოკვდავს, თვალწინ - ხელშესახები, ღმერთო!

გულო, გეყოფა გლოვა, დადექ და დამიოკდი!
ღმერთო, შენს რჩეულს - მოკვდავს,
დავტირით, თითქოს მოკვდი!