ენვილური სონეტი ნანა კობალაძეს

ნანა, ეს - შენ - ჩემგან . ფოტო გავიტაცე, ლექსიანად ჩემთან დავდებ.

#ლექსები

ნინო დარბაისელი

ენვილური სონეტი*
(ნანა კობალაძეს)

მანიშნებელი ავდრის
ცაზე - ღრუბელი-გრდემლა,
ამ ღრუბელს ვინ რას ადრის,
თვალები ამიცრემლა.

თითქოს გართხმულა თეთრად,
თან მეწამულიც ჰქვია,
ჭექამ ხმა გაიმკვეთრა,
დაუშენს რიყეს - ქვიანს.

ო, რა საშინლად ავდრობს,
მთვარე ყირაზე დგება.
ამბობენ, გარეთ ამ დროს
ძაღლიც არ გაიგდება.

ქუხს მტკვარი თბილისურად.
გრგვინვა - თან მოჰყვა სურათს!

- - -
*
ენვილური ანუ გრდემლური, დაბალი ღრუბელი თბილისის ცაზე - გარდაუვალი გრგვინვის, ჭექა- ქუხილიან- წვიმიანი ავდრის ნიშანია . (ადრესატის ინფორმაცია)