ბატონი იქსი - სონეტი მაგრიტს

#ლექსები
ნინო დარბაისელი

ბატონი იქსი - სონეტი მაგრიტს

(“სიტყვა ნაწყვეტი გამოგვიცხადებს უფრო მეტს, ვიდრე მთელი პოემა” - გალაკტიონი)

ამბობთ ცოტას და გულისხმობთ მრავალს,
თქვენსას არ ამხელთ თავგადასავალს,
ამასობაში ეს ჟამიც გავალს.
ვინ გადებთ, რა - ვალს?

ხართ ცეცხლოვანი, არდახვეწადი,
არდავარდნადი, არც რის ხვეწადი,
საცაა, გავა ეს წელიწადი.
“- არ მოგწონს?! - წადი!”

ხართ - ჯოჯოხეთის მდინარე - სტიქსი,
მდუმარე სფინქსი, ცეცხლის ფენიქსი,
ჩამონათვლისა მე დამრჩა იქ სი…
თქვენ კი გამქრალხართ - ბატონი იქსი!

ღამე ვათეთრე და გავახამე,
მაგრიტს კი მაინც ვერ შევეხამე.