რა გადაიტანს

რა გადაიტანს ცხრაგზის ცხრა ზამთარს…
ცხრა მთას და ცხრა ზღვას რა გადაივლის…
ან ურმის თვლებში შებმულ სამართალს
სად გაეშლება თეთრი ყვავილი…
კოშკს ვინ შეაბა თითო სარკმელი
და სარკმელს იქით - თითო სიცოცხლით
ვისი გაისმა, ნეტავ, სათქმელი,
ან უთქმელობის სევდას ვინ მოთვლის…
ვისი სულია, ასე რომ სურდათ -
მუფარახად და ტკბობის ტარიგად,
შესაწირავად ცხრაგზის ვნებულთა:
მზეთა,მთვარეთა და ოტარიდთა…
ვინ გადაიტანს ზამთრის ბუდეებს
და, ცვილნარევი თითების მტვრევით,
მიუტევებელს ვინ მიუტევებს…
თვალს ვის აუხვევს რიყის ქვის მტვერი…
ან ქარაშოტი საით წაიღებს
ამ ჰანგებს - მღერას ფერად ყვავილთა…
ან განშორების სასტიკ თარიღებს
რა გადაიტანს… რა გადაიტანს…