გიგის და დათას წერილი ცას

პატივცემულო ცაო,
მოგმართავთ დიდი თხოვნით:
გამოგვიგზავნეთ ბავშვებს
მონატრებული თოვლი!

ნუ მოიმარჯვებთ საცერს,
დაუშვით ფთილა-ფთილა,
სამი დღე-ღამე ბარდნოს,
ოღონდ, იყავით ფრთხილად, -

არ შეერიოს წვიმა,
ცაო, თოვლ-ჭყაპით, აბა,
რას ვიგუნდავებთ, ან რა
თოვლის ბაბუებს დავდგამთ?!

წერილს ხელს ვაწერთ ქვემოთ
ძმები, - გიგი და დათა,
რომ შეგაწუხეთ თხოვნით,
დედიკოსთან ნუ გაგვთქვამთ!