სექტემბერი

სექტემბერი , ირიბი და ალმაცერი,
თვე მტირალა, წვიმა ღრუბლის ანაცრელი.
მზის ბარძიმი, დაშაქრული, სანატრელი,
ქარვის თვლებად აკინძული რქაწითელი.

შემოდგომის ყვავილების გაღიმება,
საფერავით გულიანი დალხინება.
ღობე-ღობე ჭინჭრის მწველი ახირება,
შებრაწული ჩალის თივად აზვინება.

სამერცხლეთის შფოთიანი აწივლება,
მავთულებზე სათათბიროდ დაწყვილება…
საუბარი: - წასვლის დროა, მეგობრებო,
ავიბარგოთ, ალბათ მალე აცივდება!