სწრაფვა

II

მოისწრაფვოდი მაგრამ განედის
ვერ გადმოლახე ნისლოვანედი

და სწრაფვით რაღაც ფანტასტიურით
გადაარღვიე რკალი ციური.

გადაიარე დღენი მწკრივობის,
ვით მიდამონი არსად მკვრივობის

და უანკარეს დღეთ დამშვიდებით
არასდროს გითქვამს წრფელად: ‘’მშვიდობით’’.

არსად ყოფილა კრთომათ ჩვენება,
არსად უკუსვლა და მოსვენება.

მოისწრაფვოდი ნათლის სხივივით
არა წუხილით და არც ჩივილით

და მაინც, მაინც ვერ მოახლოვდი
იქ, სადაც ერთ ჟამს სულში სახლობდი.