ჭორის სურნელი

ჭორაობდნენ ჭორიკნები,
ჭრიჭინებდნენ ჭრიჭინები,
ამოხოცეს ჭორის ნებით
გალავნის და ბჭის გმირები.

ფოთლებს მოსწყდა სევდის წვეთი,
ჟამი იყო მიძინების,
სხვა რა იყო ამის მეტი _
ჭრიჭინებდნენ ჭრიჭინები.

აღაზევეს აღმა ერთი,
ჩამოართვეს სხვას ჩინები,
რაღა იყო ამის მეტი _
ჭრიჭინებდნენ ჭრიჭინები.

ჭაჭანებდნენ ჭის გარშემო
ჭინკები და თხუნელები,
იჭვრებოდა, იშლებოდა
ჭორი ჭარბი სურნელებით...